秀英廚房 100%透心涼 椰汁龍眼肉冰冰冰

秀英廚房

 100%透心涼 
椰汁龍眼肉冰冰冰


    清甜，滋潤，解暑
 注意做法，濃度，甜度控制

天氣又焗又熱！真係無乜胃囗！飲返杯透心涼既甜品，真係爽到震呀!

呢杯--100% 椰汁龍眼冰冰冰！非常容易整！自家製，落足料，夠哂，香濃，滋潤，又解渴！掂呀！唔使成日可樂，檸茶，咁悶啦！

100% 椰汁龍眼冰冰冰，食譜

材料： 桂圓（龍眼肉），椰漿，冰糖，冰

 因為有D桂圓（龍眼肉）個甜度比較假，做唔出個清甜味，所以必須㨂一D靚既桂圓（龍眼肉）！

做法：

1） 桂圓（龍眼肉）用水沖沖

2）桂圓（龍眼肉）隨凍水落，煲水，水大滾五分鐘熄火，焗住佢，直到桂圓（龍眼肉）發開，出味！

--可以煲多少少，雪住佢用 /做冰粒

3）試味，如果認為唔夠甜度，可以加少少冰糖再煲一陣

-- 由於每隻桂圓（龍眼肉）甜度，有唔同！所以要試味！

-- 一般凍野，雪涷左會無甜，所以通常會加少少冰糖既

-- 椰漿本身有少少甜，所以最好先試試你果隻椰漿，有幾甜，咁可以大概知道---桂圓（龍眼肉）糖水甜度要有幾多！

4）放入雪櫃雪 

-- 部分糖水可以做冰粒，飲果時加又唔會變淡，又更加透心涼

5）將雪凍左既桂圓（龍眼肉）糖水，先放入杯，可以加埋冰，最先再加椰漿！！


-----透心涼，椰汁龍眼冰冰冰，飲得----