是日-私伙靚湯 春夏版--滋味醉雞 滋潤，溫和調補身體

是日-私伙靚湯

春夏版--滋味醉雞
滋潤，溫和調補身體


****注意材料處理，加減*****

醉雞！唔係冬天先食咩？？夏天都補？咪好鬼燥？

--呢個春夏版-醉雞 改左少少材料，比較岩春夏食！其實一年四季都要補！

----只要知道自己體質，㨂岩食材，時間，需要時服用 咁就唔會有問題啦 !!!

女人唔補好易老架！呢個「補」字，除左補養皮膚，身體，身材之外！仲要補充唔同方面既知識！等自己與時並進⋯唔會out!
春夏版---滋味醉雞 食譜


   *** 注意材料處理，加減***
****傷風感冒未清，燥熱朋友，禁食****


材料：雞半隻，沙參，海玉竹，黨參，北芪，川芎，淮山，圓肉 花雕酒

***北芪比較燥D，怕燥可以將份量減/完全唔落

*** 如果唔食雞既，純飲湯，只係要個味既，可以買個雞殻 ！甚至用豬月展 代替！

*** 花雕酒係醉雞靈魂，係湯好之前10-15分鐘先落，酒香無咁快揮發哂

*** 花雕洒 600ml 左右已經夠，覺得唔夠味先再加！


做法：

1）所有藥材洗淨，浸半小時，倒左D水唔要，再用淸水沖下佢，再將黨參剪開，容易出味D

藥材可能有硫磺燻過，浸下可以去左D 酸味

2）雞 洗淨，斬件，去皮出水，去左雞皮，個湯無咁油 / 豬 月展 洗凈出水

3）煲水，（所有藥材凍水落），大滾轉慢火煲45分鐘至一小時

4）雞有2個處理方法：

A) 可以用少少鹽，酒，麻油，薑汁，將雞醃左味，然後係藥材湯底煲到最後15分鐘至20分鐘, 直接將雞，放落藥材湯，再加花雕酒煮！

B) 用少少油，爆香D薑，落雞件，加酒爆香，之後，將雞放落藥材湯，加花雕酒滾15分鐘左右！食得！

----  兩個方法都好味，視乎個人喜好，鐘意雞味濃D 定清D！

5）煲好加少少鹽調味

藥材功效
圓肉：補血養心

川芎：活血行氣，祛風止痛，用於月經不調，經閉痛經，胸脅刺痛，跌打腫痛，頭痛，風濕痹痛。

海玉竹：海玉竹比普通玉竹更加清香！可以加強滋陰降火功效！

清熱、養陰、生津、潤燥、潤肺作用；有調和血氣運行功效，亦有降血脂、降壓作用

淮山：健脾益氣

沙參：用於陰虛肺燥，乾咳少痰，勞嗽痰血

北芪：係黃芪一種，生長係北方的黃芪，氣溫，味甘，平，十分 

功效--- 補氣昇陽，補中益氣，利水消腫，適合南方調補用

黨參功效：

-補氣

-黨參對神經系統有興奮作用，可以增強機體抵抗力

-可以增加兔紅細胞及血紅蛋白增加

-擴張周圍血管而降低血壓，抑制腎上腺素的升壓作用

-具有調節胃腸運動，抗潰瘍，抑制胃酸分泌

- 對化療和放射線引起白細胞下降有提升作用 -

美膚全攻略 捉緊護膚黃金時間 M後篇 -- 巳附補氣血湯譜/茶譜

美膚全攻略
捉緊護膚黃金時間
M後篇
巳附補氣血湯譜/茶譜

補氣養血方便湯包/材料現巳有售

\點解M後要保養?

皮膚，身體點保養至好?
補血唔補氣，可能引發肌瘤
簡單湯水，人人做到
拍拍拍，緊緻皮膚，促進血液循環

點解M後係保養黃金期？
 要內外夾攻咁嚴重

M後既 10日 女性雌激素增加，皮膚水份回升，新陳代謝加快，膠原蛋白合成更加好，皮膚吸收能力最好所以應該係呢個黃金期，加強深層滋潤，用D高效，質素高既產品提升皮膚質素

排卵期亦係美白最好時機之後再深入傾

身體方面M後，有所流失，成個人特別攰，黑眼圈都深左，總之就虛弱左 !
 一定要好好保養返，唔理唔理，懶懶行！唔係嚇你 ....身體差，皮膚差不特止，仲好容易提早衰老架搽咩好野都無咁吸收身體機能差，脾胃，氣血唔好，新陳代謝又慢，又點會靚先

所以除左平日要Keep之外，M後加強保養，自然由內靚到外，個人都Sharp D

M後淨補血唔補氣，NoNo
- 有可能引發肌瘤 

- M既第五日，其實已經可以開始逐步調理身體，直至完全M完 就可以全面調補
- 大家成日話M完，飲D紅棗水補下血啦，呢個要小心呀 補血唔補氣，有機會引發肌瘤架

-- 氣係咩？有咩用？

- 氣主肺，主五臓六府之氣，脾氣運行得好，氣血得以生化💫簡單d講，氣好似一個泵咁，帶動/推動血液流動 氣好，血液流動自如，暢通無阻，咁自然身體好，講野都大聲D，好中氣D 

-點解補血唔補氣 會有問題

-氣唔好/唔夠 血積聚成肌瘤

1 氣虛血瘀：身體差，久病 /長期體力透支 所以氣虛血弱，體內氣血運行差 /停滯，日子有功變瘀血

2 氣滯血瘀：因情緒唔好，抑鬱致肝氣鬱結，肝氣功能麻麻，容易氣滯血瘀，瘀血積於子宮

3 痰瘀互結：脾胃虛弱朋友，特別體型肥胖朋友 通常痰多濕重，體液運行失調，痰容易積係子宮

4 寒凝血瘀：M / 生B後 受寒邪入侵，邪正相搏，凍親/身體變得凍左 瘀血，寒氣，積聚係腹中

所以M後必定要補氣養血，滋陰滋潤   氣血好，面色好，吸收好，身體好，就一定靚靚人都後生D

以下湯譜可以先順序補氣血，再祛下濕/直接食花膠等湯水，滋潤滋陰。雙管齊下，自然靚到嘩嘩聲

湯譜

北芪黨參瘦肉湯

-- 感冒中朋友忌食

-- 黨參功效：補氣養血 ，心悸，氣血兩虛，面青青，容易感冒朋友都可以用
-- 黨參可以令紅細胞增多、血紅蛋白增加，所以貧血朋友都岩食黨參

-- 北芪功效：補氣昇陽，利水消腫

-- 材料：北芪，淮山，黨參，瘦肉

-- 做法：所有材料洗淨，肉出水，黨參剪開一開二，容易出味d，淮山先浸45分鐘，再用清水沖

藥材隨凍水落，水大滾先加肉，煲大約一個半小時，加鹽調味

黨參南棗茶

- 功效：補氣補血

- 材料洗淨，黨參剪碎d，南棗唔燥唔使去核

- 所有材料放入暖杯，熱水焗最少半小時

黨參黑豆瘦肉湯

-黑豆功效：滋陰，補血，祛風，利水
-黑豆補血精髓在於豆衣

材料：黨參，黑豆瘦，瘦肉

做法：

-- 1. 黨參洗淨切段，黑豆洗淨後浸20分鐘，瘦肉切件洗淨出水備用。

-- 2. 水滾後，將所有材料放入煲內，滾15分鐘後轉細火煲多75分鐘，放鹽調味，即成。

花膠螺頭湯

可用雞/ 豬展 雞比較補，燥熱朋友可用豬𦟌

功效：滋陰，健脾，補充膠原蛋白質

材料及做法：

-- 花膠預先浸發，果皮浸軟去嚢，螺頭預先浸，浸螺水可用返煲湯，豬展出水，淮山預先浸45分鐘再沖水
-- 果皮，淮山，螺頭隨凍水落，水滾落肉，滾10分鐘 轉慢火煲2個半小時💫最後半小時先落花膠，煲好加鹽調味

滋潤滋陰花膠糖水

材料 - 花膠，蓮子，冰糖
（可加一片薑）

做法：功效💫滋潤，清心火，安神

1 蓮子隨凍水落，至水滾煲10分鐘，再加花膠滾20分鐘，加冰糖調味

拍拍拍出緊緻皮膚

洗面後，化妝水，最好用手拍上面，手勢係順應皮膚紋，向上拍，細細力，唔使拍到紅哂
-可以喚醒皮膚，加快吸收
-可以緊緻皮膚

美膚全攻略 捉緊護膚黃金時段 M前，M中保養篇

美膚全攻略
捉緊護膚黃金時段
  M前，M中保養篇
巳附湯水食譜
敷Mask Tips 小分享

護膚，補身都講一樣Timming 架只要Timing 岩，用岩自己既湯水，護膚品自然事半功倍啦

Timing 係咩黎

---Timing 係指女性既生理週期,  因為係生理週期前後 女性荷爾蒙分泌會有所轉變
荷爾蒙同我地皮膚狀態有密切關係 只要因應住呢個轉變 用岩野效果係好容易見到

M前M中 
湯水 護膚Do & Don't 

首先我地將-- M期-生理週期分3 Part ,M前  M中 M後 

M前一星期---非常燥底生人勿近

M前M中做好功夫 避免皮膚，身體狀態變差

--M後可全力把握黃金時間，集中滋潤，補身，實行內外全面提升

M前，平日維持女性皮膚細緻既雌激素，急劇下降 相反, 黃體激素增加 皮膚變得多油，出粒，出痘痘，粗糙，暗唖，個人極度好火 乜都唔順眼 身體新陳代謝減慢，容易水腫  血虛，心血少既人，訓得特別差

--總之M前就好似放大鏡咁，將平日皮膚問題/皮膚或者身體潛在問題 乘機爆出黎

飲食，湯水方面

M前，M中 主要補水，滋陰滋潤，溫和，偏溫湯都可以

- 唔可以太補/太涼 避免經血太多  涼茶，玫瑰花茶，生冷野，雪梨等可免則免

- 熱底/陰虛內熱朋友 著重滋陰滋養便可 紅棗水，杞子圓肉茶唔好飲

湯譜

桑寄生蓮子蛋茶

功效-補肝腎，養心安神，祛下肢水腫

做法
1.桑寄生，蓮子 洗淨，用水浸半小時💫然後瀝乾水 蛋煮熟，去殼留備用
2.桑寄生，蓮子隨凍水落，水滾後轉細，火再煲一小時，
3. 桑寄生唔要，加熟雞蛋滾至雞蛋上色入味，加少少片糖調味

花膠螺頭湯
可用雞 / 豬展

功效：滋陰，健脾

材料及做法：
--花膠預先浸發，果皮浸軟去嚢，螺頭預先浸，浸螺水可用返煲湯，豬𦟌出水，淮山預先浸45分鐘再沖水
--果皮，淮山，螺頭隨凍水落，水滾落肉，滾10分鐘💫轉慢火煲2個半小時 最後半小時先落花膠，煲好加鹽調味😋

養生蓮子羹
功效--滋潤，清心火，安神

1 雪耳/黃耳/銀耳 先浸，再去掟，蓮子先去蕊，再用水浸，45分鐘
2 蓮子隨凍水落，至水滾煲10分鐘，再加雪耳/黃耳/銀耳 滾10分鐘，加冰糖調味

牛肉茶

燥熱，感冒朋友勿飲
體虛，虛寒朋友可用

功效---滋補脾胃，益氣血消腫利水
鐵質，蛋白質豐富

做法--牛肉洗淨 , 絞碎，然後用一碗水浸牛肉，之後將牛肉連水放燉盅，放兩片薑，小火煮至少四十五分鐘。

--水燉煮完後，去渣，清湯就對女人最好的湯品

二冬茶
材料：天冬 麥冬，生地黃，枸杞子，南棗，瘦肉

功效：滋陰血，清虛熱 💥可用係心肝陰虧，陰虛火旺，出現失眠、煩躁、口腔潰腔、潮熱等症

黑木耳紅棗瘦肉湯
怕太燥可用南棗

材料：黑木耳💫紅棗，瘦肉，陳皮

做法：1. 黑木耳洗淨 浸軟；紅棗去核洗淨；瘦肉洗淨，氽水，備用。

2. 果皮隨凍水放 水滾後，將所有材料放入煲滾15分鐘，轉細火煲多45分鐘，放鹽調味

皮膚方面 -皮膚變得脆弱，容易敏感，所以必須注重補水，用性質溫和產品
-- 暫停美白，Peeling，果酸
-- 可用溫和深層清潔，軟化角質
-- 加強補濕，抗氧化

-- 生理期失血較多，身體新陳代謝變慢，皮膚明顯變黃，暗唖😨色斑比較明顯 一到M期，皮膚變得敏感，吸收能力差 ! 美白祛斑就唔適合了  所以美白、祛斑一定要提前到M前一星期開始加強

Mask 小Tips
毛巾一定要質地軟熟 否則可能磨損面部皮膚
***皮膚敏感朋友勿試***
毛巾溫熱可以了, 不可太熱 以免灼傷

洗面後，可以用小熱毛巾先敷面，再敷深層清潔面膜，之後再用小熱毛巾清走深層清潔Mask

之後再敷濕Mask 
再按摩 效果超吸收

2014 開個靚頭先- 快速養顏--方法

2014 開個靚頭先-

快速養顏--方法

大家都工作忙碌，又燉又煲真係無咁多時間。我睇過本雜誌教過以下方法可以好方便咁補充骨膠原


首先，將花膠浸發，然後剪開細細粒，搵個食物盒裝起佢放入雪櫃下格。（如果日日食放雪櫃下格就可以了）

倒一杯鮮奶，放幾塊預先浸發左既花膠片，一齊放入微波爐叮熱／用煲煲熱咁就可以了（個人建議煲，始終微波爐煮食無明火咁健康）

對奶敏感／唔飲奶-方法

用冰糖水代替（淡淡地可以了，可加D薑汁），煲定D冰糖水雪放落之後雪起，代替以上用鮮奶既做法。

以上方法keep住食一排，皮膚質素會有明顯改善，注意！脾胃寒濕既人就唔好長期食呀