是日-私伙靚湯 春夏版--滋味醉雞 滋潤，溫和調補身體

是日-私伙靚湯

春夏版--滋味醉雞
滋潤，溫和調補身體


****注意材料處理，加減*****

醉雞！唔係冬天先食咩？？夏天都補？咪好鬼燥？

--呢個春夏版-醉雞 改左少少材料，比較岩春夏食！其實一年四季都要補！

----只要知道自己體質，㨂岩食材，時間，需要時服用 咁就唔會有問題啦 !!!

女人唔補好易老架！呢個「補」字，除左補養皮膚，身體，身材之外！仲要補充唔同方面既知識！等自己與時並進⋯唔會out!
春夏版---滋味醉雞 食譜


   *** 注意材料處理，加減***
****傷風感冒未清，燥熱朋友，禁食****


材料：雞半隻，沙參，海玉竹，黨參，北芪，川芎，淮山，圓肉 花雕酒

***北芪比較燥D，怕燥可以將份量減/完全唔落

*** 如果唔食雞既，純飲湯，只係要個味既，可以買個雞殻 ！甚至用豬月展 代替！

*** 花雕酒係醉雞靈魂，係湯好之前10-15分鐘先落，酒香無咁快揮發哂

*** 花雕洒 600ml 左右已經夠，覺得唔夠味先再加！


做法：

1）所有藥材洗淨，浸半小時，倒左D水唔要，再用淸水沖下佢，再將黨參剪開，容易出味D

藥材可能有硫磺燻過，浸下可以去左D 酸味

2）雞 洗淨，斬件，去皮出水，去左雞皮，個湯無咁油 / 豬 月展 洗凈出水

3）煲水，（所有藥材凍水落），大滾轉慢火煲45分鐘至一小時

4）雞有2個處理方法：

A) 可以用少少鹽，酒，麻油，薑汁，將雞醃左味，然後係藥材湯底煲到最後15分鐘至20分鐘, 直接將雞，放落藥材湯，再加花雕酒煮！

B) 用少少油，爆香D薑，落雞件，加酒爆香，之後，將雞放落藥材湯，加花雕酒滾15分鐘左右！食得！

----  兩個方法都好味，視乎個人喜好，鐘意雞味濃D 定清D！

5）煲好加少少鹽調味

藥材功效
圓肉：補血養心

川芎：活血行氣，祛風止痛，用於月經不調，經閉痛經，胸脅刺痛，跌打腫痛，頭痛，風濕痹痛。

海玉竹：海玉竹比普通玉竹更加清香！可以加強滋陰降火功效！

清熱、養陰、生津、潤燥、潤肺作用；有調和血氣運行功效，亦有降血脂、降壓作用

淮山：健脾益氣

沙參：用於陰虛肺燥，乾咳少痰，勞嗽痰血

北芪：係黃芪一種，生長係北方的黃芪，氣溫，味甘，平，十分 

功效--- 補氣昇陽，補中益氣，利水消腫，適合南方調補用

黨參功效：

-補氣

-黨參對神經系統有興奮作用，可以增強機體抵抗力

-可以增加兔紅細胞及血紅蛋白增加

-擴張周圍血管而降低血壓，抑制腎上腺素的升壓作用

-具有調節胃腸運動，抗潰瘍，抑制胃酸分泌

- 對化療和放射線引起白細胞下降有提升作用 -

是日-秀英私伙靚湯 春夏秘密武器之一 keep fit 滋補 消暑一take過！

是日-秀英私伙靚湯

春夏秘密武器之一
keep fit 滋補 消暑一take過！

滋補滋潤 同時 有效祛脂，祛水腫，祛濕，消暑，清熱，降血壓、血脂，通便  

**** 留意內容，注意湯料加減 ****
**** 已附各材料功效 ****


呢個湯功效又係超強！

滋潤滋補，同時明顯祛水腫，去便便創暢通左，少左肚谷谷既感覺！暑氣全消！---》最重要係好鮮味架！

一take過湯譜

****痛風症朋友唔可以飲****
****腎虛朋友只可以飲少少****
****留意材料增減****

材料：冬瓜，瘦肉，冬菇，陳皮，茯苓，黑木耳 / 白背黑木耳，扁豆，生熟薏米，綠豆，花膠，竹笙, 黃豆 



做法：

1）冬瓜洗淨去囊，切大件，唔使去皮，去左皮無咁消暑架！

2）瘦肉出水，所有豆類，薏米洗淨

3） 果皮浸軟，刮囊 ，冬菇浸一陣，去蒂！浸菇水可以返煲湯用

4）竹笙，浸十五分鐘，換水浸多一陣---》湯差唔多好先落，有咬口

5）黑木耳 / 白背木耳 浸一陣，去蒂！！** 唔好浸太軟身，煲湯爛唒！

6）已發花膠，一至兩塊，((可以唔落))  湯煲好前30分鐘先落！


****陳皮隨水落，其他材料大滾水落， 大滾十分鐘，轉慢火煲2個半小時，加鹽調味***

Sent from my iPhone

** 有粟米加埋仲正

** 如果體質比較虛寒又好想飲，可以唔加綠豆！改為加幾片薑，但薑必須用刀背拍扁，咁先出味架！
各材料功效

茯苓- 利水祛濕，安神，健脾

陳皮- 行氣，健脾

黑木耳/ 白背木耳 - 有效通血管，防止心血管病

竹苼- 有效減少腹壁脂肪囤積，有刮油作用 ，止痛，補氣，降膽固醇功效

冬菇- 去脂，清熱潤腸，解毒，促進新陳代謝，加強體內廢物排泄，對膽固醇，血壓過高有食療功效，冬菇多醣可以刺激淋巴細胞活化因子，提高免疫力 

扁豆，健脾，祛濕，消暑

黃豆- 健脾，潤燥，潤大腸，益氣，解毒，抗菌消炎

冬瓜- 消熱，祛水腫

生熟薏米- 通便，排毒，抗癌，治皮膚病

綠豆-清熱，解毒，去瘡

花膠-滋陰滋潤，補虛

新鮮到步 ，特大章魚

新鮮到步 ，特大章魚
    ~~~已附湯譜~~~~

超級新鮮
成隻手咁長
香味濃郁
煲湯一隻已經夠哂

章魚功效：

益氣養血 主治氣血虛弱
癰疽腫毒，久瘡潰爛
收斂，生肌，坐月用

~~~天氣又濕又熱，試下煲節瓜，味道比較清甜D桇

節瓜章魚湯

材料：節 瓜
章 魚
豬 骨
花 生

做法:

1. 節瓜去皮洗淨，切 件 ，花 生洗淨
2. 章魚用清水沖一沖，同豬 骨一齊飛水（出水）之後再將章魚剪開，容易出味D
3. 煲水，水大滾，落哂所有材，大滾十分鐘，轉慢火煲2個半小時，加鹽調味

治虛好幫手 原色海龍

治虛好幫手
原色海龍

淋巴有問題，虛喘
夜尿，痰火，甲狀瘤朋友要留意

---已附湯譜--
--已附個案分享--

身體虛弱，氣管差，淋巴等等問題，的確好麻煩！手尾又長！腎虛仲煩，成日去V V ！海龍可以針對以上問題，效果幾好😊

原色海龍係乜東東

海龍係硬骨魚類，係廣東，海南沿海地區都有出產

海龍係原隻曬乾而成

原色-意思係未經漂洗加工原色海龍係灰黑色，💥漂洗過先會白雪雪既，樣係靚，但係療效大減

原色海龍功效

原色海龍含蛋白質、脂肪、維生素A、B及多種氨基酸、多種礦物元素
所以用黎日常保健，都好好架

~~~原色海龍功效~~~

補腎壯陽-（壯陽係提升身體陽氣，即身體內太陽強D，例如無咁怕凍，精神D，唔好淨係諗左去果邊呀）

治淋巴結，慣性淋巴發炎
治虛喘，氣管虛弱
治痰火
治尿頻，夜尿
散結，消腫
活血
容易攰，精神差，老人家都可以

孕媽媽，燥熱，感冒未清朋友忌食

~~成日聽人講海龍海馬，唔係要一齊用咩？

海龍，海馬，功效一樣，但海龍功效比海馬更加強

痰火/痰火核係咩黎 

痰火其實幾似哮喘，煩熱胸痛，口乾唇燥，痰塊好難咳出黎

頭部及耳後有痰核，摸到粒粒狀，有少少痛

~~~個案分享~~~

我自己係一個麻煩人，扁桃腺天生比較大同生得出！只要一有喉嚨痛，感冒，淋巴核就好容易會腫脹，發炎 醫生直頭將我列為慣性發炎！因為發炎次數多，令我淋巴核纖維化左 即係會摸到硬左一粒野，硬硬地咁 唔係瘤，只係慣性發炎，令佢大左，好難收縮返！但咁易發炎日咁，好辛苦

無意中，聽人話海馬煲湯對淋巴容易腫，發炎好架，咁就試下煲！反正無壞 一星期煲一至兩次！飲左兩個月多D，摸下之前硬硬地個淋巴核，直頭唔見左！自此之後keep住飲，當然無一開始煲得咁密！但真係無再發炎了😊

之後表第同樣因為淋巴發炎，腫到入醫院，自此亦變成慣性發炎 之後介紹佢煲海龍湯！飲左一輪，無再發炎了

~~湯譜~~

***海龍蘋果瘦肉湯（可加淮山）

-祛痰火，清潤，煙酒過多朋友岩，散結，清

***材料及做法

1 蘋果洗淨，去皮，去蕊
- 瘦肉出水
- 海龍出水
- 蜜棗 南北杏洗淨

2 煲水，水大滾，落哂所有材料，滾十分鐘，轉慢火煲2個半小時，加鹽調味

-

***海龍，海底椰無花果煲瘦肉湯***

-- 功效 祛痰炎，平喘，治虛喘，滋潤，止咳

---材料及做法

1 海龍，瘦肉出水
- 海底椰洗淨
- 淮山-如果用生曬淮山，洗淨可以直接用，普通的要用清水㓎45分鐘
- 無花果 -洗淨，剪開
- 南北杏洗淨
- 陳皮，浸軟，刮囊

2  煲水，水大滾，落哂所有材料，滾十分鐘，轉慢火煲2個半小時，加鹽調味

***杜仲海馬湯***

之前分享過既舒筋活絡湯亦有相同功效，可參考之前個post 

功效 減輕腰痛、補腎填精、強腰壯骨

杜仲健筋骨、補腰腎、降血壓，紓緩腰骨痠軟疼痛

材料及做法

1  杜仲，海龍，圓肉，排骨

2  所有材料洗淨，排骨，海馬出水

3 煲水，水大滾，落哂所有材料，滾十分鐘，轉慢火煲3小時，加鹽調味

完全燉湯手冊 燉出個味來 燉湯必須注意重點

完全 * *燉**靚湯手冊

燉出個味來
燉湯必須注意重點

尋日分享完 煲靚湯宜忌
今日同大家分享下 燉靚湯宜忌

\燉湯有咩好

燉湯 係將食材、藥材，隔水猛火燉，大約3小時左右

由於燉盅密封，唔單止可以鎖住湯既香味因為食物藥物精華濃縮、聚雜，營養流失比較少滋補效用更明顯

燉湯無經明火直接滾住，所以湯比較清,燉盅內既湯水都係原汁原味

經過長時間慢火燉，肉質纖維被分解，變得腍而不爛，容易消化又好味

燉湯好定煲湯好呢

燉湯原汁原味緊係好！不過唔係咩材料都適合用燉湯呢個方法架💥一定要根據食材，去決定煲定燉好

*****燉湯宜忌必須要知道*****

食材耐火程度 部分要最後落

雖然燉湯營養流失比較少 但有D食材係唔耐火，唔可以燉太耐💥否則有可能破壞食材功效架
（耐火程度-即係指食材需要用幾多時間去煲/燉，愈耐火即係可以用多D時間去煮 ）

因為咁有部分食材，需要要後下（最後一小時/半小時/十五分鐘至落）

例如 杞子、街市果種一條條新鮮淮山、圓肉 唔使燉太耐/太早落

湯盅水份 

-- 湯盅內水份，最多八成半滿已經足夠、唔需要太滿👍
-- 切勿中途加水，影響湯既濃度

忌寒涼食物 免破氣

-- 因為燉湯比較滋補 特別係行氣活血藥材 食左燉湯之後，切忌食白蘿蔔等寒涼性食物，以免破氣/影響功效

--女性M中避免補品

--因為M中期間補，功效唔大，而且太行氣活血藥材，有機會令M量突然加架（詳情建議參考M後篇）

-

24小時內吞落肚

- 過夜後服用藥效會降低, 其次因空氣、溫度和細菌污染等影響, 湯液中的酶分解及細菌繁殖滋生, 另外澱粉、糖類營養等成分發酵水解，會令湯液變質，反而對健康不利

- 隔起藥材，原盅放入冰箱保存，鎖住功效

-- 有時太飽，真係飲唔唒D湯，點攪？ 等D湯完全放涼，原盅放入冰箱保存 因為冰箱夠凍，可以有效鎖住燉湯成份，味道，避免變質 但只可以一晚咁多 

--冰箱拎返出黎之後，原盅徹底加熱，立即飲用💥唔好轉落煲煲呀，會破壞湯既功效同成份架

完全--- 煲--- 靚湯手冊 煲出個味來 煲湯必須注意重點

完全--- 煲--- 靚湯手冊

煲出個味來
煲湯必須注意重點

煲湯，燉湯係廣東人最拿手既養生，補健方法但係大家成日話煲湯煲湯，有無諗過，點解要煲湯？鹽要最後先落？藥材果皮要凍水落？

原來煲個靚湯都有技巧，同必須要注地方架

點解要煲湯？

營養容易吸收

湯料組合非常多，有唔同類型藥材，海味、肉類、蔬菜等等熬煮而食材中的營養成份/精華 都溶係湯入面，全水解的營養成分，電解質濃度同人體體液相近所以容易被腸胃吸收所以煲湯，係一種適合隨著人體血液循環吸收食物營養💫既養生好方法

煲湯宜忌必須要知道

煲湯，燉湯好係好，但都有D技巧，宜忌要知道架

藥材凍水落

藥材凍水落，可以令藥力有效䆁放，加快滲透力而因為凍水落藥材，藥材，藥力可以隨著溫度一步一步慢慢釋放出黎同埋藥材唔會變燥

其他材料水大滾至落

水大滾至加入湯料，可以消除湯料所含的氧氣😊營養被破壞機會亦降低

唔好太早切好哂材料

材料切勿太早切開，防止維他命會被氧化破壞

唔好大大舊拎去煲湯

瓜、肉最好唔好太大舊，細細地會營養較易釋放，又唔使煲太耐

點解肉成日要飛水（出水）

-- 可以祛除血水，異味，減低脂肪，湯無咁油膩，亦唔會有血水腥味
-- 出水最好凍水落肉 因為凍水可以將肉既雜質迫哂出黎
-- 仲可以有效將令尿酸過高既Purine 迫出黎，咁煲湯就更加健康

細火/慢火煲靚湯 

-- 細火/慢火煲湯可以令食材分子慢慢打開，慢慢將能量䆁放出黎👍又慢慢收起，將食材成分慢慢熬出黎
--特別係草藥，如土伏苓，雞骨草，必須要細火慢慢煲3小時先可以將其功效完全發揮出黎 !

--水份必須足夠

--水係煲湯關鍵，係食物的溶劑 大部分朋友係煲湯最容易犯💥第一個錯誤係加水太少! 導致中途要加水
--如果煲湯中需要加水💥加熱水最好，唔好加冷水 咁會對湯味影響最少 

-- 而且明明個湯煲緊，一盆凍水淋落去，湯既溫度急降💥所有釋放緊能量既食材，突然停止收縮返 即係明明開緊門 突然關門），又要時間再開重新令食材再次釋放能量😨

煲湯3個鐘已經夠

--煲湯要睇下湯料，再彈性調較時間 可以確保營養
--通常骨頭，藥材湯會耐D

--煲湯過長時間，會增加湯中嘌呤的含量，進而增加痛風的風險 同時食物中的營養也會慢慢流失

過早調味問題

-- 過早落鹽😨會令肉所含水分釋出，加快蛋白質凝固，影響湯既鮮味架

-- 因應天氣，身體狀況，體質去㨂湯料，補身前先祛濕，貴唔一定好，平唔一定好

-- 記得煲湯要因應天氣去配合，潮濕要祛濕，夏天唔好太補避免太燥，春天要提升陽氣
-- 個個體質唔同，同一個湯未必人人岩，所以必須知道自己體質
****湯料只要岩自己，識配搭，一樣可以有功效，唔一定要貴****

傷風感冒，唔可以飲老火湯，燉品，肉湯

再再再提大家感冒其間，脾胃變得虛弱，老火湯脾胃吸收唔到太多 而肉湯更加容易令感冒困係身體入面 好難好

厚肉版 極鮮美國乾螺頭 返來了 已附滋陰湯譜

今日精選 1 

厚肉版
極鮮美國乾螺頭返來了白色為螺頭硬殻 

已附滋陰湯譜
之前版本一樣有

今日精選
極鮮美國厚肉響螺頭

厚肉，鮮甜 煲湯落2-3隻攪掂
一年4季，一家大細都岩
不寒不燥，非常滋陰

****螺頭上塊奄先係重點，非常有益，千期唔好整走佢

螺頭乾好定新鮮好

好多朋友唔知道新鮮螺頭係寒濕架，所以係乾螺頭比較好

乾螺頭，煲湯係非常鮮甜，非常有益

澳洲定美國螺頭好？

兩隻功效一樣，煲湯一樣鮮甜，視乎你咩用途

澳洲紅螺頭  燉湯用呢隻，因為比較耐火，煲湯一樣可以但要隔晚浸定

如果想快D煲湯，方便，唔想浸太耐 就用美國響螺頭呀 功效一樣煲湯好甜！浸十分鐘，挑左條腸 就可以了

乾螺頭功效

-- 螺頭 ，味甘，藥性平和

-- 有滋陰補精、清熱去濕、治療陰虛內熱、乾咳、口乾、崩漏、濕熱五淋、黃疸肝炎、產後少乳等。

食譜:
又係百搭乜都加得佢

滋陰螺頭湯

 材料 乾螺頭　淮山　瘦肉　 陳皮

 做法
 1. 干螺頭洗淨浸軟
 2. 瘦肉飛水，其他材料洗淨
 3. 果皮隨水落，水大滾，將所有材料放入 煲，滾十分鐘，轉變慢火煲2小時加鹽調味

2. 淮生，味甘，藥性平和。有健脾止瀉、補肺益腎功用。可治療脾虛久瀉、慢性腸炎、肺虛咳嗽、慢性腎炎、遺精遺尿、白帶、糖尿病。

深海強肺之寶 大口魚干 清咳後必備 日常保健 ----已附有益BB煲粥湯底做法

深海強肺之寶
大口魚干

清咳後必備
日常保健

已附有益BB煲粥湯底做法
及大人湯譜

****哮喘，咳，一家大細都岩飲 ! 最重要係價錢經濟!

非常高興，大家試左個特效舒緩止咳湯，效果非常理想

咳清左/尾聲，成日滋潤係唔夠架，一定要強肺，打好底，徹底強化佢

該！實在係非常惡攪！一來辛苦，二來咳到自己都覺得自己黑人憎，有時咳到訓唔到出街咳到嚇親人

今日推介
大囗魚干

大囗魚身世之謎？

--大口魚  原名叫鮟鱇魚，因為佢個囗好大，所以廣東人叫佢做大口魚，係水上人既寳貝黎架好多公公婆婆指定要搵

大囗魚係深海魚黎架，因為大口魚條味特長，所以比人叫海鬼魚而又因為佢肉質含豐富膠質，所以又有🌟海中鵝肝🌟既綽號👍

~~~大口魚有乜好~~

-- 深海魚
-- 含非常豐富既維他命A D E
-- 低膽固醇，低脂肪

--煲湯好好飲，又有益--

~~~功效~~

-- 強肺，治咳，滋陰
-- 保持視力，治療糖尿病，預防肝臟疾病非常好效果

-

~~~咁好效果唔成條新鮮煲??????

-- 同花膠道理一樣，囇乾效果更好，又方便保存

食譜

鮮甜BB煲粥湯底

材料：大口魚干 ，橙色南瓜/節瓜，淮山，茨實

1. 大口魚乾洗淨後抺乾，再斬成小塊，節瓜洗淨，刮皮，切細塊

2. 可以煎/出水

~出水，用刀背拍扁舊薑，等塊薑容易出味，煲水，水滾放薑同大口魚干滾大滾3分鐘之後撈起 3分鐘好喇，滾哂D味浪費哂

~燒熱油鑊，用薑片爆香，將已斬件的大口魚乾入鑊，兩面煎香

3 煲煲細水，水滾，放入已處理既節瓜，大口魚干，滾10分鐘，之後轉慢火滾1個鐘

4 將魚湯隔乾淨，重覆2次，以免有碎骨，其他材料 **如果BB大D可以咬野，可以拎起D節瓜備用

5 米洗淨，將之前煲好既魚湯煲滾，湯滾加米，中大火煲到米變綿，如BB可以咬野，放返之前既節瓜落粥滾下

大人大囗魚湯

其實大人煲乜湯都可以加，煲清補涼最好👍蕃茄薯仔，清補涼，菜乾等，BB版湯底可以直接當湯飲非常甜

~~大口魚處理方法~~

1. 大口魚乾洗淨後抺乾，再斬成小塊

2. 可以煎/出水

出水，用刀背拍扁舊薑，等塊薑容易出味，煲水，水滾放薑同大口魚干滾大滾3分鐘之後撈起 3分鐘好喇，滾哂D味浪費哂

大囗魚煲清補涼
**傷風感冒勿飲

功效

強肺 、清潤、滋補‧

材料: 大囗魚干 淮山、玉竹、沙蔘、蓮子、百合、薏米、肇實 可加瘦肉

所有材料洗淨，肉出水，大口魚照以上方法處理好

煲水，水滾，落所有材料，大滾10分鐘，轉中慢火煲2個半小時，加鹽調味