XL 加大碼章魚皇 巳附家用版，暖杯版湯譜

XL 加大碼章魚皇
巳附家用版，暖杯版湯譜

秋冬 惹味 章魚雞粒焗飯 家用版，暖杯食譜 part 2 分享
⋯⋯

 

章魚煲湯有益又好飲，章魚果種香味，真係令人流口水架

 

呢

隻「章魚皇 」香味爆登！一夠乾爽，煲湯好甜架 ！

 

焗飯yummy yummy 呀 另有中同細 Size 可供選擇

 

章魚功效

 

功效：益氣養血，M痛，催奶，

 

 

 

 

 

--- 體質虛弱、氣血不足、手術後調理、營養不良都岩用

 

 

 

--章魚含有豐富蛋白質、礦物質等營養元素，仲有抗疲勞、抗衰老，能延長人類壽命等重要保健因子—天然牛磺酸，所以章魚都係經濟補品黎架

 

湯譜

 

1 節瓜眉頭花生雞腳湯

功效：益氣養血，可以輕量去水腫，催奶 （如果想要強勁去水腫，去濕湯譜，可以去我blog

 

 

 

 

 

家用版

 

 

材料：

 

節瓜2至3個
眉豆,花生各1兩(去雜貨舖問人最少買幾＄）
瑤柱5粒 / 元貝
章魚大隻一隻，/ 細2隻
蜜棗3粒（可以唔加）
陳皮1塊
排骨 / 豬𦟌 （可唔加）

 

做法:

1 節瓜用刀仔刮去外皮,切塊（煲湯唔好太薄，會煲爛晒）

2 花生眉洗淨，最好預先浸一小時，隔水備用

3 肉類出水

4 瑤柱 元貝用清水浸，浸貝水留起煲湯用

5 陳皮浸軟刮囊，否則好寒濕

6 章魚用熱水灼一灼，剪開佢（容易出味D）

7 煲水，陳皮，花生，眉豆，章魚，瑤柱/ 元貝可隨凍水落，水大滾再加節瓜，肉 滾10分鐘再轉細火，煲2個半小時, 加鹽調味，飲得

 

 

合掌瓜煲章魚湯

功效：滋潤，益氣養血，消熱

合掌瓜功效：溫和咁清熱解毒，理氣和中，疏肝止嘔，適宜於消化不良、胸悶氣脹、嘔吐、

肝胃氣痛、傳染性肝炎類

材料:

合掌瓜 2 至3個
章魚大一隻/ 細2隻
南北杏一小撮
蜜棗3粒
豬𦟌 / 瘦肉
陳皮一塊

做法:

1合掌瓜去皮洗淨，切件
2 肉出水
3 陳皮浸軟刮囊，否則好寒濕
4 章魚用熱水灼一灼，剪開佢（容易出味D）
5 煲水，陳皮，南北杏，蜜棗可以隨凍水落，水大滾再加合掌瓜，肉 大滾10分鐘再轉細火，煲2個半小時, 加鹽調味，飲得

 

 

暖杯焗湯專用版

 

 2 暖杯版 節瓜眉頭花生雞腳湯

 

材料：

節瓜1 個
眉豆,花生各一小撮(去雜貨舖問人最少買幾＄）
瑤柱3粒 / 元貝
章魚細一隻 / 大 1/3 / 半隻
蜜棗1-2 粒（可以唔加）
陳皮半個角
排骨 / 豬𦟌 （可唔加）

 

做法:

 

1 節瓜用刀仔刮去外皮,切塊（煲湯唔好太薄，會煲爛晒）

2 花生眉洗淨，最好預先浸一小時，隔水備用

3 肉類出水

4 瑤柱 元貝用清水浸，浸貝水留起煲湯用

5 陳皮浸軟刮囊，否則好寒濕

6 章魚用熱水灼一灼，剪開佢（容易出味D）

7 煲水，陳皮，花生，眉豆，章魚，瑤柱/ 元貝可隨凍水落，水大滾再加節瓜，肉 滾20-30分鐘，全部倒入䁔杯，焗5個半小時，飲得

 

䁔杯版 合掌瓜煲章魚湯

 

功效：滋潤，益氣養血

材料:

合掌瓜1 個
章魚細1 隻 / 大半隻
南北杏一小撮
蜜棗1粒
豬𦟌 / 瘦肉
陳皮半個角（可以唔加）

做法:

1合掌瓜去皮洗淨，切件
2 肉出水
3 陳皮浸軟刮囊，否則好寒濕
4 章魚用熱水灼一灼，剪開佢（容易出味D）
5 煲水，陳皮，南北杏，蜜棗可以隨凍水落，水大滾再加合掌瓜，肉 大滾20分鐘，全部入暖杯，焗5個小時, 飲得

 

 

 

湯料補習班 美國響螺頭之辨識 與 螺片分別

                      湯料補習班

 

美國響螺頭之辨識 與  螺片分別

 

美國極鮮甜，超厚肉響螺頭
新貨上市，冬日「推廣價」

肉厚又大隻，煲湯2至3隻已經超甜

螺頭，螺片，係日常煲湯，燉湯都會用到既材料。究竟螺頭，螺片有咩分別呢？？新鮮同乾又有咩唔同？？

美國同中國又有咩分別？？ 立即上堂啦！

「螺頭 同 螺片 分別」

「有奄無奄又點解呢」

螺頭即指藏係殼裏全個螺肉，體 積大細，視乎水質而定。

無論 美國定中國，螺頭，新鮮螺頭，乾螺頭，只要係原隻螺頭，必定會有塊「奄」！ 塊「奄」係螺頭原身已經有架喇！緊記！

「點解有D 美國螺頭有D有奄，有D又無奄架呢？？」

無論新鮮又好乾又好，大隻螺頭，通常都會去左塊「奄」賣 / 曬。 大螺頭比較厚身，味道比較鮮濃，功效高，煲湯，燉湯最岩 。

另一個去奄原因，以作大隻記號。

最後一個原因，本身已甩「奄」。

「螺片又有咩唔同呢？」

螺片係由體積極大螺肉身上切片而 成，通常取其味道，所以煲湯比較岩，功效絕對唔可以與螺頭比較


美國螺頭與中國螺頭比較

美國螺頭
- 水質關係體積較大 ， 厚肉
- 味道極鮮濃 香甜
- 功效高
- 價錢比中國貴
- 落2至3隻煲已經超甜

中國螺頭
- 來自青島、海南島、大連
- 水質關係，細隻，薄身
- 味道淡少少，無美國咁鮮濃
- 價錢比美國平
- 腥味重

仲有一款來自澳洲，由於澳洲水質好，質素、味道，功效同美國一樣咁好架，但體積比美國細。

新鮮螺頭同乾螺頭功效，分別

螺頭功效：滋陰補腎，清理肝熱 ，屬療效高海產。

新鮮螺頭味道鮮甜，但比較寒濕，功效比乾螺頭低




點揀靚螺頭


-色澤鮮明
-有光澤
-唔好太細
-聞落有陣陣鮮香味
-厚肉

真正天然生囇螺頭，無加任何調味醃製（浸過味精水），所以煲出黎既湯係超鮮甜



部分螺肉因為質素無咁好，無咁新鮮，就會透過醃製，浸味精水處理過，以提升味道。當然湯無咁鮮甜啦！





⭐️乾螺頭儲存方法⭐️

---最好放雪櫃蔬果格，可以保持半年以上，特別香港春夏，濕度高，必放雪櫃，防止發霉


---可能我鬼妹性格啦，始終美國螺頭味濃鮮甜好多！

 

點解金蠔唔係蠔？解開生囇金蠔的疑惑

點解金蠔唔係蠔？

 

解開生囇金蠔的疑惑

上回分享過，正宗「生曬金蠔」必定係非常鮮味，食落軟綿綿， 甘香又juicy 既！
⋯⋯
之但係點解有D蠔，又係叫金蠔，但食落無乜蠔味，同爽口既？ 或者咁睇啦⋯⋯「網名黎架姐」，
最大分別係「處理方法唔同」，所以味道，口感，有好大差別

解說
點解會無鮮蠔味架？
 

1- 出過蠔油

--- 部分蠔因為出過蠔油既關係（即係已經煮過大家平時買到一支支既蠔油），蠔味係出蠔油果時已經煮晒出黎，蠔味當然就⋯⋯⋯無乜啦

2- 爽蠔

--- 蠔如其名，呢種蠔本身口感係爽既，顏色亦比較淡，偏白一D。

---由於 呢隻「爽蠔」，製法係由鮮蠔經灼熟收身，再放入冰水，晾乾入袋
完全「不經曬程序」，香味淡，質地再軟身D

---因為視覺上比較好睇，餐廳，酒樓多數會用爽蠔煮齋/簡單菜式 。爽蠔大小平均，顏色較白淨D麻。

---爽蠔無經過壓縮程序，蠔身都會飽滿D，顏色最淺。

3 重有一點，就係煮過龍！！金蠔以炆計，8分鐘已經可以！絕不能太耐！太耐蠔味會流失唒！

下part 將分享金蠔最正食法，留意呀

             溫下書先

---尋日分享左「生囇金蠔」既小小知識，揀靚金蠔小Tips Y，大家重記唔記得果4個重點先？

1 半乾濕，唔會太乾
2 摸落軟身，唔會便
3 望落金金黃黃
4 聞到香濃蠔鮮味

想認識金蠔多D，可以去以下條Link 架

https://www.facebook.com/pages/秀英海味雜貨/1423234851228831?hc_location=timeline 查看更多

肥嘟嘟金蠔 隆重登場

肥嘟嘟金蠔 隆重登場

隻隻肥美，鮮味十足
Size 由4A至8A齊備
蒸，煎，炆，焗，打邊爐 都得⋯⋯

已附揀靚金蠔/處理小Tips

秋風起，又點只食臘味！一定要預埋「生曬金蠔」呀！大家期待巳久既「金蠔」，終於同大家見面！

今年一樣唔例外，會有video 分享各種金蠔既烹調同處理方法所以唔使擔心唔知點煮架！

立即帶大家了解下乜野係「金蠔」，分享下揀靚「金蠔」/ 處理小tips先

金蠔係乜東東黎架？

「生曬金蠔」每年秋冬先會有，所以絕對係「期間限定」！而金蠔既處理方法，質感，觸感，食法同大家一年四季都買到乾爭爭既「蠔豉」完全唔同架！

---「生囇金蠔」曬既時間短，大約四至七日左右。蠔仍然保留30%至35%水分，香味十足，㩒落去蠔身仍然有彈性，甚至有少少濕既感覺！

注意：用竹串起既又叫「排蠔」 ，一般用竹串起既「生曬金蠔」比較大隻，肥美D架！

而一年四季都可以買到叫「蠔豉」，顏色深，摸上手必須要夠乾身！香味同鮮味就唔可以同生曬比較😁 傳統蠔豉由鮮蠔蒸熟，再用熱風機吹乾/曬乾。蠔豉只有15%至20%水分，再放入雪房。

金蠔點解秋冬天期間限定架？
---秋冬天，濕度低，陽光又唔會太猛烈，曬出黎既蠔唔會太乾，顏色又靚，用黎囇「金蠔」就fit！而呢個時間既蠔亦比較肥美架！

⭐️㨂金蠔小Tips🌟
「金蠔」size 一般由3A 開始到8A最大。 Size 方面，個人喜好而定，一般7A已經非常足夠。😆細有細食，大有大食，只要識得揀，一樣咁正架

 !!!!!切記「金蠔」係食佢個鮮味，甘香，煮完出黎，仍然係隻隻Juicy ！

1 摸上手係軟身，唔會硬！有少少濕都唔怕架！-太乾身就會無左金蠔既鮮味，蠔汁又會少D（有D朋友更指定要濕身，顏色會無咁金黃，水分比較多，但鮮味D多汁D）

2 顏色金黃，表示金蠔係最佳狀態！蠔水份岩岩好，唔會太乾！

3 用鼻索下，蠔味香濃，鮮而不濁！

4 蠔身肥美，側邊望到蠔身脹卜卜既

____有齊以上4個入門條件，方為靚金蠔____

金蠔處理方法
-- 由於生囇金蠔，無加過防腐劑，所以「必須放冰箱保存」，即放雪糕果格！否則必定會發霉！要乖乖地唔好偷雞呀！

-- 放冰箱保存可以keep到半年以上架！

-- 如果想金蠔顏色靚D，金黃D，/ 想乾身D！放係窗邊吹「15分鐘」左右就可以！💢切忌吹太耐，太乾身既金蠔，蠔汁唔夠！唔好食架💢

 

今日精選 萬千寵愛--桂圓小公主

今日精選

萬千寵愛--桂圓小公主
粒粒金黃剔透，味道清香
 必須留意食用禁忌
巳附㨂靚桂圓肉小Tips


透心涼--甜品，將於秀英廚房分享，要留意呀！

呢位柱圓小公主，每個女仕都一定識佢！佢細細粒，又夠唒Sweet !  

---- 每個月，甚至冬天都可能需要到呢位小公主，甜下你，哄下你！


---咁多人like ，仲唔係萬千寵愛在一身!

但係呢位桂圓小公主係相當百變，煲湯，燉湯，甜品，煲粥，焗水都可以用到！

雖然佢好Sweet, 但係用唔岩，身體狀況唔ok 既時候用，反而令你更加燥底架！ 今日帶你認識下呢位桂圓小公主丫

桂圓小公主，小檔案

姓名：原名龍眼肉，別名 桂圓肉、亞荔枝，元肉、比目、荔枝奴、等等

產地：廣西、福建、廣東、四川、台灣等亞洲地區

性格：溫，味甜

居住偏好：鐘意暖濕潤環境，怕凍，不耐寒

個人強項：補益心脾，養血安神。用於氣血不足、心悸怔忡、健忘失眠、血虛萎黃
。




認識桂圓小姐既甜甜

桂圓，即龍眼肉，含糖分量高，


---》係易消化吸收既單糖，可以被人體直接吸收！

---》所以體弱貧血，有好好補益作用

---》生B後，桂圓都係重要補品之一！ 鐵，維生素B2豐富，可以減輕子宮收縮及子宮下垂感！

----》所以生B後、體虛、易攰貧血等，可以將龍眼肉，配當歸、枸杞、紅棗(去核)燉雞 / 瘦肉 ！或者每日食用龍眼肉煮雞蛋，有效活血調經，加促體力恢復！

 桂圓 食用禁忌

孕媽媽--妊娠早期，最好唔好食服用龍眼肉 /桂圓！防止因為太補血，引起胎動、早產

傷風感冒，燥熱，脾胃有痰火，濕，消化不良、噁心嘔吐忌食！

糖尿病朋友少食，因葡萄糖含量較高



點㨂靚既桂圓/ 龍眼肉??

靚既桂圓/ 龍眼肉，大小均勻、拎上手乾爽，外邊凸圓中間空

色澤剔透

今日精選 優雅靚竹笙

今日精選
優雅靚竹笙

** 已附揀靚竹笙Tips **

** 岩晒食肉獸，高血壓，keep fit ，心血管病朋友 **

** 滋味竹笙食譜，將於秀英廚房分享，要留意呀！**



竹笙其實係咩黎呢

-- 竹笙，原名叫竹蓀，寄居係枯竹根部既一種隱花類,菌柄頂有條白色既網狀裙，形狀好似一個紗燈罩

-- 因為型狀好靚，好優雅，所以有--雪裙仙子之稱架！

-- 竹笙味道不濃而爽，味道主要靠吸收湯水，湯汁的味道。


竹笙分類你要知

--- 竹笙分 野生，人工培植兩種！

~一聽到「野生」呢2個字，唔使問都知，梗係好啦！野生竹笙味道特別清香，結實架！但係野生產量極少，一両已經幾百蚊了！

-- 不過唔好帶有色眼鏡去睇-「人工培植」既竹笙先！人工培植一樣分級數，有好野架！其實我地依家食既，大部份都係人工培植架 ！

**人工培植竹笙 -- 大致上分4個品種- 依次序為 長裙，荊托，短裙，紅托，再以菌體，色澤 去分級數，所以級數高都唔會太平架！

**野生竹笙-- 貴係邊呢？除左生長期長，要好幾年先有收成，產量少之外...採摘野生竹笙有一定危險架，要依靠當地熟人，又要帶大量現金去偏遠地區收購！所以野生竹笙咁貴！



點為知靚既人工培植竹笙呢？

靚竹笙條件：色澤淺黃，裙擺夠長，肉厚，柔軟！唔會有霉爛味道！菌身完整！

--人工培植竹笙最怕係顏色太白！！—》因為顏色太白！有可能經過量硫磺，雙氧水漂白造成。
-- 有機會引起氣喘，過敏體質朋友不適！



 竹笙處理方法

-- 無論係野生/人工倍植，用清水先浸半小時，再換水浸半小時比較乾淨D架！



竹䇠功效

-竹䇠含有豐富蛋白質，氨基酸，礦物質，高血壓，心血管病朋友一樣岩食！


-- 有效減少腹壁脂肪囤積
-- 有刮油作用
-- 有止痛，補氣功效
-- 降膽固醇
-- 調節身陳代謝

----- >>>>強效去脂湯水可以睇之前個post參考

http://sauyingmok.blogspot.hk/2014/04/keep-fit.html?m=1

瑤柱，元貝的疑惑 ----助你解開選擇困難症

  ***瑤柱，元貝的疑惑***                                                                                                          

助你你解開選擇困難症

-相中分別係--日本宗谷瑤柱，中國青島貝

瑤柱，元貝，干瑤柱，乾貝⋯應該點揀好呢！係咪愈貴，愈大粒，先叫好呢？ 頭都痛埋呀！唔使愁，立即話你知！

  ~~~江瑤柱，元貝⋯究竟係乜東東先~~~

~瑤柱，元貝，干貝 其實都係同一樣野，大家都係 江瑤-貝類閉殻肌既柱頭肉（即係扇貝果粒白色野呢）曬乾而成，可以用黎製成瑤柱，有三十幾種架！

產地以中國，日本等沿海生產為主，佢地既名有好多，大多數人將大粒既叫瑤柱，細既叫元貝/貝仔！

 ~~~點㨂靚瑤柱，元貝仔呢 ?~~~

*日本瑤柱以宗谷，青森為主，以宗谷為最靚，味道鮮濃！青森味道比較清淡

*中國以青島，大連為主，以青島為最靚，元貝仔都係青島甜D架

-1 顏色 - 靚瑤柱，望落去色澤金黃/ 棕色 ，有光澤，而愈老身顏色愈深，因為非常乾身，味道更濃

*注意 青島貝仔顔色係會比日本瑤柱淡色少少，但一樣係淡金黃色！味道鮮甜架

-2 乾身 -帶有少量裂紋，已經表示夠乾身了💥千期唔好太乾，過份乾反而無咁鮮味！

-3 香味- 聞下夠唔夠香，唔會有up味架

 ~~~ 價錢點分呢?~~~

--靚瑤柱，元貝仔都會依產地，Size 甚至質素去分既，當然元貝仔價錢會平D啦！

--好多朋友有個問題，點解一樣Size ,價錢會差成一二百蚊架？....係睇落去一樣Size，但係產地同質素係有分別架！一食一浸開就知道龍與鳳

 ~~~瑤柱好定貝仔好?大粒好定細粒好呢?~~~

--瑤柱既Size 由細至大開始分，依次序為 SA-->S-->--M-->L ！

--大細粒，呢樣野好個人喜好既! 通常好多朋友瑶柱，元貝都有既......但係唔好有錯誤觀念，大粒先係好，我地應該睇下自己用途先！

~~一般黎講普通焗飯，蒸蛋，滾湯，煲粥，BB粥，用貝仔已經夠了！甚至乎炆野吊下味，一樣好鮮甜架 如果整扒豆苗呀，節瓜瑤柱甫⋯等等咁當然用返瑤柱好啦

~~~瑤柱，元貝功效~~~

--含豐富蛋白質和少量碘質，非常鮮甜

--功效：性滋陰補血、益氣健脾

--主治煩渴、陰虛勞損

~~瑤柱，元貝發霉點算好？~~

--香港特別潮濕，如果真係發左霉，唔使掉左佢架！

--拎條濕布，逐粒抹下佢，之後再放係冷氣附近吹下，之後立即包好，放入雪櫃就可以!千期唔好用抽濕機呀!!防止太乾呀！

--有時見到佢地有白色一粉咁，唔使驚，果D係鹽花，唔係發霉，發霉係綠色架！

--有鹽花係因為太乾造成！秋冬比較容易有呢個情況！用水洗一洗一樣可以食得！


~~煲唔爛既瑤柱，元貝~~

****曾經有客人要揾用手捽唔散，煲完湯依然成粒完整既瑤柱⋯⋯大家要記住無論幾靚既瑤柱，元貝都好，都唔會煲唔散架，點都會鬆開！

非一般甜姐兒---惠洲甜梅菜

今日精選


***非一般甜姐兒**
***惠洲甜梅菜***

******已附梅菜正確處理方法*****

-- 食譜將會係今日既秀英廚房 分享！
-- 記得留意食材處理重點&選擇！煮出送飯一流，超惹味，唔油淋淋既一家人浪漫啦

惠洲甜梅菜

梅菜幾乎係家常小菜，必備食材之一，煮法多多，蒸肉餅、蒸魚、扣肉等等 但要講到 優質梅菜又點可以唔提到呢位-惠洲甜姐兒Y！識得揀一定㨂呢D

---點解要㨂惠洲甜梅菜??

惠洲甜梅菜特點

-- 特別爽口、脆嫰
-- 甜度適中
-- 色澤金黃透，透亮
-- 聞落有一種淡淡甜香
-- 靚既梅菜

惠洲梅菜之所以咁出名，係因為經醃制之後，有一種獨特風味

係惠洲既古代典籍入面都記載左，梅菜既獨特醃制方法，所以出黎既甜梅菜 特別爽口，脆嫩，甜度岩岩好

唔會又老又得個甜字架 ! 所以惠洲梅菜-長期有大班fans指定搵呢位甜姐兒架!

-------梅菜口味分別，疑惑-------
-------甜梅菜咪甜爺爺⋯⋯？?

梅菜-有甜梅菜，鹹梅菜，兩種，通常廣東人，南方人會用甜梅菜，北方人會比較多用鹹梅菜

其實靚既甜梅菜，絕對唔會甜爺爺，亦唔係糖果種甜 只係小小清香清甜味，而呢種香甜同肉類係非常之夾👍 惹味又開胃

-----梅菜既食用價值，功效-----

梅菜含有豐富維生素、胺基酸、蛋白質、鈣、鎂等等人體所需既微量原素

-- 功效：開胃，消滯驅濕

-----梅菜正確處理方法-----

無論用甜/鹹 梅菜 ，煮餸之前既處理方法都係一樣

1）將梅菜放落個罩離度，開水喉用水chok chok佢先

2）之後用清水浸梅菜10分鐘左右，唔好浸太耐呀！浸左既水唔要

** 1，2部驟可以有效清除梅菜沙粒/雜質，可以令梅菜味道清新D

3）榨水，用手將梅菜多餘水份榨出！防止梅菜煮煮下出水，影響餸菜味道

絕配雙杏 龍皇南杏，美人北杏

         絕配雙杏    
龍皇南杏，美人北杏

-已附超滋潤
-超香滑杏仁茶食譜
專人配方黎架

南北杏係家居必備煲湯，煲糖水食材！之但係如果要整💫香滑杏仁茶，靚既南北杏，絕對唔可以無！因為整出黎既香濃度，差好遠好遠架!

       今日介紹 
龍皇南杏，美人北杏

-香味非常濃郁
-絕對無漂白過

南北杏功效：含有豐富蛋白質、植物脂肪，維生素E、不飽和脂肪酸

-潤燥補肺
-滋養肌膚
-生津開胃
-潤大腸
平喘

超滋潤，滑溜杏仁茶食譜

＊唔好諗住想香D，加多D北杏，北杏唔可以太多架，過量會中毒架!

＊材料 ：
1 ）靚南杏1斤
2 ）靚北杏2両
3 ）1公升鮮奶（北海道3.6效果更香濃）
4）砂糖12両，即1磅
5）煲魚袋一個

做法：

1）南北杏用水洗淨，再用清水浸3小時

2）將南北杏隔水，＊隔左既水留返備用，千期唔好倒呀!

3）必須依照以下份量去分開打攪拌機打，打出黎先至會滑溜架，千期唔好大懶豬一次過打呀！

＊每次將一碗南北杏+2碗水，放入攪拌機打（用岩岩浸過既南北杏水，唔夠先加普通水）

4）將打好既杏仁漿，倒入煲魚袋隔渣

5）用中慢火將杏仁漿邊煮邊攪💥杏仁漿一滾立即加鮮奶，立即熄火！

6）熄火先至加糖，攪拌
＊咁樣可以防止滾瀉，同煮燶

多春魚干 簡簡單單又一餐

多春魚干
簡簡單單又一餐

淡口（唔會鹹到苦） 香，唔會腥到爆

惹味食法

💥比少少油，少少薑絲，少少辣椒，隔水蒸就可以了送飯一流呀 

新鮮到步 ，特大章魚

新鮮到步 ，特大章魚
    ~~~已附湯譜~~~~

超級新鮮
成隻手咁長
香味濃郁
煲湯一隻已經夠哂

章魚功效：

益氣養血 主治氣血虛弱
癰疽腫毒，久瘡潰爛
收斂，生肌，坐月用

~~~天氣又濕又熱，試下煲節瓜，味道比較清甜D桇

節瓜章魚湯

材料：節 瓜
章 魚
豬 骨
花 生

做法:

1. 節瓜去皮洗淨，切 件 ，花 生洗淨
2. 章魚用清水沖一沖，同豬 骨一齊飛水（出水）之後再將章魚剪開，容易出味D
3. 煲水，水大滾，落哂所有材，大滾十分鐘，轉慢火煲2個半小時，加鹽調味