湯料補習班 飲雞湯禁忌(更新版）

湯料補習班

飲雞湯禁忌(更新版）

唔同種類既「雞」功效大不同

餵母乳媽媽必須注意
⋯⋯
「雞」都係日常煲湯 / 燉湯湯料之一，營養豐富又滋補，秋冬更加係湯料中頭3位呀

雞湯係好味，但唔係人人都飲得，有禁忌架！「唔同種類既雞」功效用法亦大不同，立即上堂啦！

飲雞湯禁忌
1）傷風、感冒、喉嚨痛、燥熱，避免飲雞湯！雞湯屬滋補類，唔舒服、燥熱當然唔可以飲！其次雞湯仲會將感冒困左係身體入面，好難好架！

2手術後，都不宜立即用雞湯 / 滋補藥材，調理身體，隨時「虛不受補」！好大件事架！補都要step by step 慢慢升級！

--手術後最好飲幾次滋潤，健脾胃湯水，滋養下 warm up 下身體先！再慢慢調理身體

3 胃酸過多都不宜飲雞！雞湯有刺激胃酸分泌作用。胃潰瘍、胃酸過多或胃出血病人，要避免。

4 膽囊炎、膽石症經常發作朋友，都少飲為妙雞！雞湯內脂肪既消化需要膽汁參與，而雞湯會刺激膽囊收縮，容易引起膽囊炎發作

5 高血壓朋友 容易引起動脈硬化外，會令血壓持續升高，好危險！

6 高血脂 雞湯中脂肪被人體吸收後，會令膽固醇升高。膽固醇過高，會係血管內膜沉積、引起冠狀動脈硬化等疾病！所以飲少少好喇

7 腎功能不全 雞湯內含有-->細小分子蛋白質 ，

由於急性腎炎、急慢性腎功能不全或尿毒症朋友既腎肝對蛋白質分解產物不能及時處理，一旦飲多左雞湯，會引起高氮質血症，會令病情惡化
 雞的種類與功效分別

老母雞

功效：温中益氣补、補虛勞、健脾益胃，對身體虛弱，M痛，貧血，怕凍有好好既食療作用

老雞好處：

老母雞蛋白質含量高，容易被人體吸收。

老母雞肉有對人體生長發育有重要作用的磷脂類，所以調理身體效果好好！

老雞煲出黎既湯，膠質比較重。
禁忌：

-如果要餵母乳，孕媽媽產後切忌用老雞！

1）老母雞令乳汁不足

母乳係由於產後血液中既雌激素、孕激素濃度大大降低，催乳素先會促進發揮作用泌乳的作用，促使乳汁分泌。💢而老母雞卵巢、蛋衣中有一定含量雌激素，血液中雌激素濃度增加，催乳素減弱，導致乳汁不足！

相反公雞，可以促進乳汁分泌！

2）若乳腺不通，切勿用公雞！

雄激素具有對抗雌激素作用。如果發現乳腺不通，即乳房發脹而無奶，切勿食公雞催奶，否則會引起乳腺炎。

烏雞
功效：滋陰清熱、補肝益腎、健脾作用。補而不燥

 烏雞可提高生理機能、延緩衰老、強筋健骨、對預骨質疏婦女缺鐵性貧血癥等有明顯功效。

好處

-膽固醇，脂肪含量低

-鐵原素比普通雞高

-烏骨雞內含多種人體所需營養素，豐富黑色素，蛋白質，B族維生素等18種氨基酸、18種微量元素 而磷、鐵、鉀、鈉的含量高於普通雞肉，

所以烏雞係營養價值極高，補而不燥滋補品。
經濟小Tips

 如果想煲雞湯，同拎雞味，唔想用冰鮮雞，又想經濟D，可以用雞殻代替架！價錢平

 

 

補身「前」 必讀手冊

補身「前」 必讀手冊

秋冬一到，手凍腳凍，皮膚乾到爆裂，大家都好自然會燉下湯、補下身。特別美女們，女人唔補好易老架！

但係大家通常忽略左 / 唔知道「補身必須注意事項 」。
⋯⋯

補身之前，大家必須要清楚自己身體狀況，底子⋯⋯ 等等！千期唔好人補你又補，人話好你又買！

胡亂進補，只會補出個禍來，以虛不受補為例，只會愈補愈虛！！咁就有排攪了！

-- 只要補得岩，程序岩，效果好明顯見到架！


點解要補身先？

其實一年四季都可以補，但係春夏同秋冬既進補方法，藥材都有好大分別！

要補身必須對「陰」「陽」有基本認識





--「陽氣」等如太陽/ 泵一樣，溫養全身組織、維護臟腑功能作用。




--「陰液」等如一支精華素一樣，滋潤滋養全血液，五臟六腑。






「陰陽平衡」- 即係全身機能Run得順𣈱，氣血行得好，精華素又夠「陰液」，自然訓得好，面色好，皮膚靚啦！冬天都唔會怕凍！望落都後生D！


可惜，因為生活壓力，飲食習慣，例如生冷野，肉太多等等⋯⋯都會破壞身體既平衡狀態！



--身體自然差，年紀愈大，感覺愈明顯！甚至乎提早衰老（機能/ 外表）！


--所以，男女都好，唔好懶，及早攪好身體！補下身！醫療費用，護膚品都慳唔少架！當然心情都非常重要啦！

秋冬先補得，春夏唔得咩？

---係中醫角度春夏屬「陽」，「秋冬」屬「陰」。


---秋冬陽氣不足，而且天氣比較凍，最岩補身，著重滋養多D，藥材方面用性溫一D都可以。


--相反，春夏又濕又熱，根本唔太適合補身。就算要補，藥材都要溫和、中性D！

正確補身方法


1）必須清楚自己底子先。
--- 寒底、熱底、陰虛內熱（食少少熱氣野，容易上火）補身方䅁都會唔同。
例如：
1）熱底，陰虛內熱朋友再用當歸，鹿茸，圓肉呢類溫熱藥材！燥上加燥，喉嚨痛兼爆粒！

2）咁寒底呢，用鹿茸呢D得啦！NoNoNo ! 如果本身虛寒，一下字比用藥性咁溫補藥材，隨時虛不受補！嘔事小，愈補愈虐就大件事!

所以補之前，最好睇下中醫，順便問下醫師自己岩食D咩！

2）食花膠之前，最去去濕先，脾胃無濕阻，吸收好好多。效果更加明顯架！

-如果脾胃有濕阻，食花膠後，胃可能會頂住頂住，唔舒服架！

注意：如果秋冬（特別燥底朋友）最好煲滋潤滋陰湯水先，再飲祛濕茶，最後先食花膠 / 補品。咁樣補身，效果就最好！

 如果身體燥熱/ 乾燥，仲飲去濕茶/ 湯水，效果等如森林大火，唔用水救火一樣，仲火上加油一樣！更乾更燥熱！！

---> 祛濕茶方可以去我blog--》http://sauyingmok.blogspot.hk/2014/02/blog-post_25.html?m=0

如果唔睇中醫，又唔清楚自己底子，補身前，最好煲D平和，健脾胃湯水，清潤下。

）各位美人，應該盡量把握「M後黃金期」，補身，敷mask ，養膚！效果係平日十倍架！稍後分享！

********補身禁忌********

-1）傷風、感冒、咳、喉嚨痛，立即停止所有老火湯、燉品！否則感冒困係身體入面，好難好返！


-2）女仕M前十天左右，停止所有補品。避免起粒，出瘡！


-3）如果你長期夜訓/身體寒濕，濕熱/燥熱 又未做足準備工夫!
避免食鮮奶類燉品呀


﹣長期夜訓，睡眠不足，肝臟毒素比較多，鮮奶燉品，有機會因肝臟清除唔到毒素，毒素有機會係面度谷出黎。咁就大鑊架喇！最慘係唔知道仲係咁飲！

大家補身前，記得注意以上事項呀！
謝謝大家收看

 

戒口指南 成日話唔舒服要戒口，究竟要戒咩？ 以下係戒口分享，大家參考下丫

戒口指南

成日話唔舒服要戒口，究竟要戒咩？ 以下係戒口分享，大家參考下

~~小兒忌食

- 柿，韭菜，糯米，比較難消化

- 皮膚病忌食

- 肉類：牛，羊，鵝，鴨，田鷄，鴿，蛇  如果皮膚癢戒雞皮

-  蔬菜：所有菇類 包括靈芝，芛

- 所有海鮮：包括昆布，海帶，海草

- 生果：芒果，榴櫣，木瓜，荔枝，菠蘿，龍眼，柿

- 豆類：對豆類過敏

- 所有辛辣煎炸食物，糯米，洒精，濕熱食物

~~痛風忌食

- 動物內臟，蝦蟹，沙甸魚，豆類，椰菜，菠菜，冬菇，酒精，牛奶，奶製品盡量少食

- 關節，肌肉痛忌食

- 牛肉，糯米，酸野，辛辣，煎炸

*****寒性食物

- 所有凍飲，凍食，綠茶，啤酒，魚生，豆漿

- 生果：橙，芒果，西瓜，蔗，桔，柿，梨，楊桃，哈蜜瓜，山竹，柑，葡萄柚，百香果，桑椹

- 蔬菜：白菜，西洋菜，白蘿蔔，大芥菜，竹荀，冬瓜，苦瓜，紹菜，青瓜，霸黃花，生菜

- 廿四味，夏枯草，五花茶，金銀花，雞骨草

*****熱，濕熱性食物

- 肉類：羊肉，牛肉，魚肉，烏雞

- 五穀：糯米

- 生果：茘枝，榴櫣，菠蘿，番荔枝，紅毛丹，柿，芒果，楊桃，桔

- 豆 ：黑豆

- 蔬菜 ：生薑，大蒜，辣椒，胡椒

****感冒忌食

- 所有老火湯，肉湯，補品，煎炸，油膩野  

--因為感冒期間，脾胃消化力減弱，根本消化唔到ed野，反而加重負荷！而老火湯等等，有機會將感冒困身好難好

--雞，鴨，鵝，辛辣，煎炸，柿，海鮮

***要清楚自己係咩感冒先，例如風熱感冒仲飲薑茶，仲辛苦

完全燉湯手冊 燉出個味來 燉湯必須注意重點

完全 * *燉**靚湯手冊

燉出個味來
燉湯必須注意重點

尋日分享完 煲靚湯宜忌
今日同大家分享下 燉靚湯宜忌

\燉湯有咩好

燉湯 係將食材、藥材，隔水猛火燉，大約3小時左右

由於燉盅密封，唔單止可以鎖住湯既香味因為食物藥物精華濃縮、聚雜，營養流失比較少滋補效用更明顯

燉湯無經明火直接滾住，所以湯比較清,燉盅內既湯水都係原汁原味

經過長時間慢火燉，肉質纖維被分解，變得腍而不爛，容易消化又好味

燉湯好定煲湯好呢

燉湯原汁原味緊係好！不過唔係咩材料都適合用燉湯呢個方法架💥一定要根據食材，去決定煲定燉好

*****燉湯宜忌必須要知道*****

食材耐火程度 部分要最後落

雖然燉湯營養流失比較少 但有D食材係唔耐火，唔可以燉太耐💥否則有可能破壞食材功效架
（耐火程度-即係指食材需要用幾多時間去煲/燉，愈耐火即係可以用多D時間去煮 ）

因為咁有部分食材，需要要後下（最後一小時/半小時/十五分鐘至落）

例如 杞子、街市果種一條條新鮮淮山、圓肉 唔使燉太耐/太早落

湯盅水份 

-- 湯盅內水份，最多八成半滿已經足夠、唔需要太滿👍
-- 切勿中途加水，影響湯既濃度

忌寒涼食物 免破氣

-- 因為燉湯比較滋補 特別係行氣活血藥材 食左燉湯之後，切忌食白蘿蔔等寒涼性食物，以免破氣/影響功效

--女性M中避免補品

--因為M中期間補，功效唔大，而且太行氣活血藥材，有機會令M量突然加架（詳情建議參考M後篇）

-

24小時內吞落肚

- 過夜後服用藥效會降低, 其次因空氣、溫度和細菌污染等影響, 湯液中的酶分解及細菌繁殖滋生, 另外澱粉、糖類營養等成分發酵水解，會令湯液變質，反而對健康不利

- 隔起藥材，原盅放入冰箱保存，鎖住功效

-- 有時太飽，真係飲唔唒D湯，點攪？ 等D湯完全放涼，原盅放入冰箱保存 因為冰箱夠凍，可以有效鎖住燉湯成份，味道，避免變質 但只可以一晚咁多 

--冰箱拎返出黎之後，原盅徹底加熱，立即飲用💥唔好轉落煲煲呀，會破壞湯既功效同成份架

完全--- 煲--- 靚湯手冊 煲出個味來 煲湯必須注意重點

完全--- 煲--- 靚湯手冊

煲出個味來
煲湯必須注意重點

煲湯，燉湯係廣東人最拿手既養生，補健方法但係大家成日話煲湯煲湯，有無諗過，點解要煲湯？鹽要最後先落？藥材果皮要凍水落？

原來煲個靚湯都有技巧，同必須要注地方架

點解要煲湯？

營養容易吸收

湯料組合非常多，有唔同類型藥材，海味、肉類、蔬菜等等熬煮而食材中的營養成份/精華 都溶係湯入面，全水解的營養成分，電解質濃度同人體體液相近所以容易被腸胃吸收所以煲湯，係一種適合隨著人體血液循環吸收食物營養💫既養生好方法

煲湯宜忌必須要知道

煲湯，燉湯好係好，但都有D技巧，宜忌要知道架

藥材凍水落

藥材凍水落，可以令藥力有效䆁放，加快滲透力而因為凍水落藥材，藥材，藥力可以隨著溫度一步一步慢慢釋放出黎同埋藥材唔會變燥

其他材料水大滾至落

水大滾至加入湯料，可以消除湯料所含的氧氣😊營養被破壞機會亦降低

唔好太早切好哂材料

材料切勿太早切開，防止維他命會被氧化破壞

唔好大大舊拎去煲湯

瓜、肉最好唔好太大舊，細細地會營養較易釋放，又唔使煲太耐

點解肉成日要飛水（出水）

-- 可以祛除血水，異味，減低脂肪，湯無咁油膩，亦唔會有血水腥味
-- 出水最好凍水落肉 因為凍水可以將肉既雜質迫哂出黎
-- 仲可以有效將令尿酸過高既Purine 迫出黎，咁煲湯就更加健康

細火/慢火煲靚湯 

-- 細火/慢火煲湯可以令食材分子慢慢打開，慢慢將能量䆁放出黎👍又慢慢收起，將食材成分慢慢熬出黎
--特別係草藥，如土伏苓，雞骨草，必須要細火慢慢煲3小時先可以將其功效完全發揮出黎 !

--水份必須足夠

--水係煲湯關鍵，係食物的溶劑 大部分朋友係煲湯最容易犯💥第一個錯誤係加水太少! 導致中途要加水
--如果煲湯中需要加水💥加熱水最好，唔好加冷水 咁會對湯味影響最少 

-- 而且明明個湯煲緊，一盆凍水淋落去，湯既溫度急降💥所有釋放緊能量既食材，突然停止收縮返 即係明明開緊門 突然關門），又要時間再開重新令食材再次釋放能量😨

煲湯3個鐘已經夠

--煲湯要睇下湯料，再彈性調較時間 可以確保營養
--通常骨頭，藥材湯會耐D

--煲湯過長時間，會增加湯中嘌呤的含量，進而增加痛風的風險 同時食物中的營養也會慢慢流失

過早調味問題

-- 過早落鹽😨會令肉所含水分釋出，加快蛋白質凝固，影響湯既鮮味架

-- 因應天氣，身體狀況，體質去㨂湯料，補身前先祛濕，貴唔一定好，平唔一定好

-- 記得煲湯要因應天氣去配合，潮濕要祛濕，夏天唔好太補避免太燥，春天要提升陽氣
-- 個個體質唔同，同一個湯未必人人岩，所以必須知道自己體質
****湯料只要岩自己，識配搭，一樣可以有功效，唔一定要貴****

傷風感冒，唔可以飲老火湯，燉品，肉湯

再再再提大家感冒其間，脾胃變得虛弱，老火湯脾胃吸收唔到太多 而肉湯更加容易令感冒困係身體入面 好難好

女仕們既鑽石級補品 豐富補充版 已附升級調理食譜

女仕們既鑽石級補品
豐富補充版
已附升級調理食譜

雞泡膠係近期女士們 至hit熱話之一 你又點可以唔知
今日介紹 女仕之寶 雞泡膠

雞泡膠功效非常好
爆Like

雞泡膠能夠登上女仕門補品No 1，當然有實力有食力啦

雞泡膠係雞泡魚肚。
主要針對女性
膠質豐富，口感軟滑
特別滋陰，療效高。效果顯著

 功效
調理身體
-- 主要針對女性婦科病💫例如 M唔準，荷爾蒙失調，M痛，可以穩定荷爾蒙蒙
-- 想生B 預備生B
-- 産後調理-身體愎原比較快，傷囗亦會埋得快D
-- 手術後調理
-- 糖尿病 白內障朋友亦可以

-----男人咪唔得食得 ???

--咁又唔係只係女性食效果顯著d 特別想生B朋友，同先生一齊食，效果更好

食譜
雞泡膠--燉效果比較好，可以將雞泡膠功效完全發揮

想效果好，先祛濕，脾胃吸收好多

預備生B/想生B朋友

2人份量
-- 最好同先生一齊食，頭頭一星期2次
-- 材料：雞泡膠6至8隻，白蓮子8至10粒，百合8塊左右，果皮一塊

做法：
1 果皮浸軟，去囊 百合，白蓮子洗淨。已浸發雞泡膠備用，瘦肉出水
2 果皮，百合，白蓮子，瘦肉先燉，一個半小時 再加雞泡膠燉一小時加鹽調味

想升級滋補，紅粉菲菲
燉紅豆沙
一人份量

-- 必須確定無燥熱先可以食，非常補
-- 只有燉雞泡膠先有升級效果

--材料：果皮一瓣，紅豆，百合，雞泡膠3至4隻

 做法：
1 果皮浸軟，去囊💫百合洗淨。已浸發雞泡膠備用

2 燉果皮，紅豆，百合先💫先將紅豆燉腍💫約一個半小時💫臨好之前半個鐘先落雞泡膠，燉半個鐘，加冰糖燉多5分鐘食得😊

日常調理身體
一人份量
材料：雞泡膠3-4隻，果皮2瓣
淮山4塊，乾螺頭5粒 ，瘦肉/豬𦟌

做法：
1 果皮浸軟，去囊 已浸發雞泡膠備用，瘦肉出水。乾螺頭預先一晚浸，浸螺頭 准山，洗淨，先用清水浸45分鐘，倒左d水，再用清水沖下

2 果皮，瘦肉，乾螺頭，淮山先燉，一個半小時 再加雞泡膠燉一小時 加鹽調味

花膠入門精讀班﹣Part 2

                                                             花膠入門精讀班

                                                                      Part 2
                                                    （建議由Part 1 開始睇起）

＊花膠咩候食最好呢？

﹣其實一年四季都岩食，但最好確定自己，無傷風感冒，

﹣濕熱/濕/虛不受補既情況因為脾胃虛寒/濕消化能力差食左可能會唔舒服

﹣袪左濕先，容易收好多

﹣手術後

﹣生B後⋯⋯

﹣做完激光，彩光/刺激膠原蛋白增生光學療程後對身體自身增生膠原蛋白非常有效


＊花膠厚薄浸發時間＊
﹣
浸發花膠必須因應花膠厚薄，去調整花膠浸發時間
過左籠會走曬D膠架

＊正確煲花膠湯方法＊

﹣好多朋犯既錯誤明明好大舊花膠架，點解會得返一塊野其實D膠只係溶晒係湯度？
﹣正確煲花膠湯方法，

1  先將已浸發，係冰箱拎出黎既花膠解凍，用熱水係咁易沖下。
2等湯煲好之前30分鐘至落花膠煲。

花膠入門精讀班，落堂啦
謝謝大家收睇

花膠入門精讀班 Part 1

                                                              花膠入門精讀班 
                                                                       Part 1



~花膠好呀，有益成日聽！但好係邊呢？邊隻膠岩自己？平貴有咩分別？大家好多時一頭霧水！😅有見及此，今堂將會同大家簡單咁了解下🌼花膠究竟係乜東東

花膠即魚鰾，又名魚肚。佢膠質豐富所以有海洋人參既美譽架

＊花膠有咩咁好先?

﹣豐富蛋白質，膠質，磷質及鈣質等多種徵量元素。
﹣低脂肪
﹣治肺腎虛弱
﹣固本培元 ✅增精強腎
﹣補氣活血 ✅美容護膚⋯⋯
﹣補而不燥，男女老少都岩（糖尿病，哮喘病人均可食用，哮喘，糖尿病，三高人仕避免甜食）

＊花膠價格，會因：
﹣產量，魚種，質素，年份 -再分級數分價錢。價錢真係可以相差好遠架！

＊頭數係咩？貴價花膠有頭數之分，一隻一斤稱為一頭

＊＊花膠種類，級數＊＊
1.金錢鰵 
2 金山鰵 
3.石鰵
4生開肚鰵肚
5白花膠（太多分別之後再講）
6筒膠 （鴨泡肚）
7.黃魚膠 8.紮膠 9.門鱔肚
10.雞泡膠（＊治療婦科病非常有效＊）
11.紐肚
12赤肚1
3花膠粒

＊應該點揀岩自己花膠？＊
﹣除左價錢同質素之外，如果有特別需要一定要睇功效，例如婦科病
﹣平唔一定唔好架！
﹣只要配合岩自己既食材，一樣可以有效果：）

＊點為之靚花膠
﹣完整一塊/一隻
﹣透明乾淨
﹣色澤方面，金黃有光澤，愈黃代表愈老身。愈老身愈好！花膠會因時間而收水（即花膠內的水份蒸發左）纖維更結實，質感更爽！發起好滑溜

＊花膠公乸又有咩分別呢？
﹣口感比較容易分✅花膠公比較爽口，有（趙）頭！煮都比較耐火。無咁瀉身。
﹣乸則比較軟身同漿

＊鹹水定淡水花膠？
﹣其實好個人喜好。即係你鐘意食鹹水魚定淡水魚！野生緊係好！但價錢相對貴。鹹水亦一樣！
﹣真係要分，鹹水即海魚魚鰾，發頭大又挺身，腥味較淡

＊點食最好？
﹣真係個人喜好，燉湯，燉糖水，炆一樣得
﹣最緊要因應自己身體需要，配合適合自己既材料，藥材，就可以發揮效果

美人補身 必讀！

                                                                美人補身必讀
                                                  做個靚靚CEO管理自己身體

內容包括：
破壞自己平衡大件事
亂補一通後果大件事
正確補身方法，平貴有序
食補品之前準備工夫
燉鮮奶唔一定好
⋯⋯
＊靚-人人都想，真正既靚係要靚得健康，由底靚到上面但要靚得徹底，唔係話係咁做Mask ，搽好多護膚品，食補品就得 ！必須由基本功做起，了解自己需要，持之而恆，咁就用咩都容易吸收D，事半功倍：）

都市女性壓力大，隨時忙到人都癲！但女人十八無醜婦？係，的確後生女係有本錢。但唔好以為後生大哂呀。一樣會提早衰老

長期捱夜，睡眠不足，壓力大心肝脾肺腎齊齊傷！身體不斷虛耗，肝臟毒素增加！皮膚身體唔差就奇！最大鑊仲會破壞身體平衡！長期捱夜，壓力大都有機會導致男性荷爾蒙會增加，女性賀爾蒙減少即內分泌失調。月經失調，皮膚問題，情緒病肥胖等等所以必須好好管理身體女性荷爾蒙

身體差補下咪得！於是乎咩參茸海味，花膠，唔理三七二十一。塞曬落肚。咁做無效果之餘，仲可能補出禍來
如果未清楚自己身體狀況，係咩底子，有可能虛不受補，反而仲虛辛苦虛不受補，即脾胃消化差，根本承受唔到滋補野。其次，本身已經燥底，寒濕/濕熱，仲食D溫熱野補，又係搵黎攪！

＊＊正確保養補身方法＊＊

﹣最好睇下中醫，了解自己底子，狀況，天氣。用岩自己藥材，補品，效果會更理想🌸如果唔知自己咩底子，就用一D性質平和既野湯水。去滋陰滋潤，健下脾胃先。唔好立即補！
記住補唔一定貴，貴唔一定好

﹣食補品之前，最好去濕健脾先，等脾胃吸收好D（之前介紹個去濕茶，效果好好，可參考下）

﹣如果太燥，先滋潤下火。燥唔一定涼茶。狂清熱一樣有反效果。反而滋潤下，令身體無咁熱，身體滋潤左自然無咁燥熱，簡單至無花果救命水絕對幫到你
（可參考之前食譜）

﹣傷風感冒未清，補品老火湯都唔可以飲。因為會將感冒困係身體入面，好難好

＊花膠燉鮮奶，有營養又滋補，有咩唔好呀！！！＊

﹣如果你長期夜訓/身體寒濕，濕熱/燥熱 又未做足準備工夫！我唔太建議你用鮮奶燉花膠
﹣因為長期夜訓，睡眠不足，肝臟毒素比較多，係咁用成日鮮奶燉，有機會因肝臟清除唔到毒素，毒素有機會係面度谷出黎。咁就大鑊！最慘係唔知道仲係咁飲！

﹣最好當然生活有規律，配合均衡飲食，適當運動，再配合適當湯水：）

2014 開個靚頭先- 快速養顏--方法

2014 開個靚頭先-

快速養顏--方法

大家都工作忙碌，又燉又煲真係無咁多時間。我睇過本雜誌教過以下方法可以好方便咁補充骨膠原


首先，將花膠浸發，然後剪開細細粒，搵個食物盒裝起佢放入雪櫃下格。（如果日日食放雪櫃下格就可以了）

倒一杯鮮奶，放幾塊預先浸發左既花膠片，一齊放入微波爐叮熱／用煲煲熱咁就可以了（個人建議煲，始終微波爐煮食無明火咁健康）

對奶敏感／唔飲奶-方法

用冰糖水代替（淡淡地可以了，可加D薑汁），煲定D冰糖水雪放落之後雪起，代替以上用鮮奶既做法。

以上方法keep住食一排，皮膚質素會有明顯改善，注意！脾胃寒濕既人就唔好長期食呀